Fjórði Pólverjinn handtekinn vegna nauðgunarinnar á Selfossi

Fjórði maðurinn hefur verið handtekinn vegna nauðgunar sem kærð var til lögreglunnar á Selfossi um helgina. Þrír höfðu áður verið handteknir en sá fjórði var handtekinn í þágu rannsóknarinnar að sögn lögreglu.

Rannsóknin er gríðarlega viðamikil og voru 12 manns yfirheyrðir í dag og þrír til viðbótar nú í kvöld. Á morgun mun fara fram sakbending í málinu en reiknað er með að á fjórða tug manna komið að henni. Nauðgunin mun hafa átt sér stað í heimahúsi á Selfossi og tugir vitna munu hafa verið á staðnum.

Hinir grunuðu eru allir pólskir ríkisborgarar en dvelja hér á landi vegna atvinnu sinnar.

Gæsluvarðhald yfir mönnunum þremur sem handteknir voru á sunnudaginn rennur út klukkan 16:00 á fimmtudaginn. Þeir sitja í gæsluvarðhaldi á Litla-Hrauni.