Mótmæla Bitruvirkjun á Hengilssvæðinu

Andstæðingar Bitruvirkjunar hafa nú opnað heimasíðu hengill.nu þar sem fyrirhugaðri jarðgufuvirkjun á Hengilssvæðinu rétt austan við Ölkelduháls er mótmælt.

Á heimasíðunni er almenningur hvattur til að gera athugasemdir við virkjanaáætlanir. Svæðið er búið að fara í umhverfismat sem kynnt var á fundi með íbúum svæðisins um síðustu mánaðarmót. Frestur til að senda Skipulagsstofnun athugasemdir rennur út 9. nóvember.

Virkjanaandstæðingar gagnrýna harðlega að Orkuveita Reykjavíkur sem sér um framkvæmd virkjunarinnar hafi látið gera umhverfismatið og beri kostnað af því. Andstæðingar segja slíkt umhverfismat ekki marktækt. Þeir leggja til að Hengilsvæðið sem lengi hefur verið vinsæll útivistarstaður verði friðað.