Steingrímur í kosningavímu í Köben

"Það er rosaleg stemmning hérna og formaðurinn var að klára ræðuna sína. Hann var að vonum hylltur og tekið sem þjóðhetju," segir Steingrímur J. Sigfússon formaður Vinstri grænna sem staddur var í Pumpehuset í miðborg Danmerkur á kosningavöku Sósíalíska Þjóðarflokksins.

Flokkurinn er systurflokkur Vinstri grænna og var Steingrímur greinilega mjög ánægður með gengi flokksins sem samkvæmt fyrstu tölum hefur tvöfaldað fylgi sitt.

"Þetta er nú bara með sögulegri sigrum sem maður hefur séð en auðvitað er leiðinlegt að það verði ekki stjórnarskipti. Það má segja að þetta sé hliðstætt kosningunum heima, þar sem við vorum sigurvegarar kosninganna en það urðu ekki stjórnarskipti," segir Steingrímur sem var í miðjum látunum þegar Vísir náði af honum tali.

Hann sagði menn þó ekki vera að svekkja sig á því heldur væru í sigurvímu og létu þá staðreyndi í léttu rúmi liggja. "Það er að vísu ekki alveg útséð með hversu stór meirihlutinn verður en það er nokkuð öruggt að meirihlutinn verður veikari en áður," sagði Steingrímur en það lítur allt út fyrir að nú þurfi fjórir flokkar að vinna saman í stað þriggja.

"Það verður spennandi að sjá hvernig það samstarf á eftir að ganga. Þeir eru eins og hundar og kettir í innflytjendamálum og fleiru. Formaðurinn gaf í skyn í ræðu sinni að hann héldi að það yrði boðað fljótlega aftur til kosninga."

Steingrímur sagði klárt mál að það hefðu verið mistök hjá Anders Fogh Rasmusen að boða til kosninga á þessum tíma, hann hefði oftmetnast og haldið að hann hefði þetta í hendi sér. "Hann kemur veikari út úr þessu en hann var áður og landslagið er verulega breytt á vinstri vængnum. Velferðarmálin verða til dæmis meira á dagskránni, það er alveg klárt mál," sagði Steingrímur og bætti því við að mjög greinileg vinstri sveifla væri í dönskum stjórnmálum um þessar mundir.