Fimm konum nauðgað um helgina

Fimm konum var nauðgað um helgina, að sögn deildarstjóra Neyðarmóttöku nauðgana. Þrjár þeirra áttu sér stað í heimahúsum og tvær í miðbæ Reykjavíkur. Ein kona hefur kært til lögreglu.

Tveir menn grunaðir um að hafa nauðgað rúmlega fertugri konu í húsasundi í miðbænum aðfaranótt sunnudags voru úrskurðaðir í gæsluvarðhald í gær. Að sögn lögreglu var konan að koma ein af skemmtistað á Laugavegi, sem mennirnir höfðu líka verið á, þegar þeir drógu hana inn í húsasund og nauðguðu henni. Konan var með töluverða áverka og kærði málið samstundis til lögreglu.

Þá var rúmlega tvítugri konu nauðgað í húsasundi í Hafnarstræti aðfaranótt laugardags en lögregla hefur ekki vitneskju um árásarmanninn. Rannsókn stendur enn yfir en búist er við kæru í því máli. 120 nauðgunarmál komu inn á borð Neyðarmótttökunnar það sem af er ári en allt árið í fyrra voru þau 146.

Nauðganirnar þrjár sem áttu sér stað í heimahúsum um helgina hafa ekki komið inn á borð lögreglu. Stöð 2 greindi frá málinu í kvöldfréttum sínum.