Lýsa þungum áhyggjum af áfengisfrumvarpi

SAMAN-hópurinn svokallaði, sem meðal annars vinnur gegn unglingadrykkju, lýsir þungum áhyggjum af frumvarpi um sölu léttvíns og bjórs í matvöruverslunum. Skorar hópurinn á alþingismenn að standa vörð um heilbrigði og framtíð íslenskra barna og ungmenna og hafna frumvarpinu.

Í SAMAN-hópnum eru nú tæplega 30 fulltrúar frá öllum stærstu sveitarfélögum landsins auk helstu félaga og samtaka sem láta sig velferð barna og ungmenna varða. Bent er á að íslenskir foreldrar hafi upp til hópa staðið sig með miklum sóma og tekið hvatningum og ábendingum SAMAN-hópsins geysilega vel og neysla íslenskra unglinga á áfengi og öðrum vímuefnum hafi minnkað undanfarinn áratug. Hún sé nú minni en í löndum sem við berum okkur saman við.

Vísar hópurinn til rannsókna Lýðheilsustöðvar sem ótvírætt sýni að aukið aðgengi að áfengi auki neyslu þess, líka meðal unglinga. Telur hópurinn að frumvarpið gangi gegn allri reynslu og þekkingu sem hafi gefið góða raun í forvarnarstarfi á Íslandi undanfarin ár.