Björgólfur ríkari en Trump og Spielberg

Íslenski kaupsýslumaðurinn Björg-ólfur Thor Björgólfsson hækkar sig um 101 sæti og kemst í 249. sæti yfir ríkustu menn heims á lista tímaritsins Forbes. Eignir Björgólfs Thors eru metnar á 3,5 milljarða bandaríkjadala, eða um 235 milljarða króna. Í fyrra voru eignir Björgólfs metnar á 2,2 milljarða dala og þá sat hann í 350. sæti yfir auðugustu menn veraldar.

Björgólfur er nú orðinn ríkari en margir heimsþekktir einstaklingar úr viðskiptalífinu og skemmtanaiðnaðinum. Þannig er kvikmyndaleikstjórinn Steven Spielberg í sæti 287, metinn á þrjá milljarða dala, og fasteignamógúllinn og sjónvarpsstjarnan Donald Trump enn neðar, í sæti 314. Í sæti númer 488 eru svo Malcolm Glazer og synir hans sem keyptu Manchester United fyrir háa upphæð fyrir skemmstu.

Þeir eru varla hálfdrættingar á við Björgólf. Sjónvarpskonan Oprah Winfrey er metin á 1,5 milljarða dala í sæti 664 og Björgólfur Guðmundsson kemst í fyrsta sinn á listann, situr í sæti 799 metinn á 1,2 milljarða dala.

Þótt Björgólfur hafi hækkað talsvert á listanum á hann enn eftir að taka fram úr ófáum stórlöxunum á leið sinni á toppinn. Fyrir ofan Björgólf má finna George Lucas og Bernie Ecclestone (243. sæti), Giorgio Armani (177), Ralph Lauren (158), Steve Jobs (132), Rubert Murdoch (73), Silvio Berlusconi og fjölskyldu (51) og Roman Abramovich, eiganda Chelsea (16). Ríkasti maður heims samkvæmt Forbes er sem fyrr Bill Gates. Eiginir hans eru metnar á 56 milljarða Bandaríkjadala.