Vill að Landsvirkjun endurskoði áform um virkjanir í Þjórsá

Björgvin G. Sigurðsson vill að Landsvirkjun endurskoði áform sín um virkjanir í neðri hluta Þjórsár í kjölfar þess að fyrirtækið ákvað að selja ekki orku til álvera á suðvesturhorninu á næstunni. Haft er eftir viðskiptaráðherra á vef Samfylkingarinnar að hann telji að hinar nýju tillögur eigi að vera í sátt við fólkið á Þjórsárbökkum en töluverð andstaða hefur verið við virkjanirnar þrjár, Hvammsvirkjun, Holtavirkjun og Urriðafossvirkjun meðal þeirra.

Björgvin minnir á að fyrir nokkrum árum hafi Landsvirkjunarmenn talað fyrir miklu umfangsminni rennslisvirkjunum á þessum stöðum í ánni. Orkan sem Landsvirkjun ætlaði að fá í Neðri-Þjórsá sé enn óseld og ljóst sé að netþjónabú og kísilvinnslustöðvar þurfi hvert um sig miklu minni orku en álver þótt þau borgi betur. Því geti Landsvirkjun náð sáttum við íbúa á Þjórsárbökkum og við náttúruverndarfólk í landinu með því að koma fram með nýjar tillögur um orkuöflun í Neðri-Þjórsá.

„Ég er þó alveg viss um að ef þær líktust upphaflegum áformum um rennslisvirkjanir í ánni neðanverðri yrðu heimamenn reiðubúnir að ræða málin til hlítar," segir Björgvin.

„Ég teldi það ábyrgðarleysi af Landsvirkjun, þessu stóra orkufyrirtæki í 100% ríkiseigu, að nota ekki þau tækifæri sem nú bjóðast til sátta í málinu með nýjum tillögum í þessa veru. Ef þeir hjá Landsvirkjun ætla að halda áfram einsog ekkert hafi í skorist - ja, þá eru hugmyndir þeirra um virkjun Neðri-Þjórsár jafnvondar og áður, hvað sem líður yfirlýsingum fyrirtækisins um kaupendur orkunnar," segir hann enn fremur á vef Samfylkingarinnar. Hann kallar eftir ábyrgum viðbrögðum Landsvirkjunar í stað útúrsnúninga.