Vilja koma upp pappírsvinnslu, kísilhreinsun og netþjónabúum

Fyrirtæki sem hyggja á pappírsvinnslu, gagnavistun og kísilhreinsun hér á landi eru meðal tugs fyrirtækja sem Orkuveita Reykjavíkur hefur rætt við undanfarna mánuði um orkusölu.

Þetta kemur fram á vef Orkuveitunnar. Þar segir einnig að Hjörleifur B. Kvaran, forstjóri Orkuveitu Reykjavíkur, telji að að forsendur orkusölusamnings til Alcan í Straumsvík séu brostnar. Hjörleifur vísar þar til þess að einsýnt sé að ekki verði af byggingu nýs álvers fyrirtækisins í Straumsvík og að Orkuveitan geti ekki ein og sér útvegað fyrirtækinu næga orku í annað álver, en eins og kunnugt er ákvað Landsvirkjun að selja ekki orku til álvera á suðvesturhorninu á næstunni.

Á vef Orkuveitunnar segir að fyrirtækið hafi síðustu mánuði rætt við tug aðila um orkusölu, þar af sjö sem hafi hug á starfsemi sem ekki krefst losunarkvóta. Á meðal þeirrar starfsemi er kísilhreinsun, pappírsgerð og gagnavistun.

Þá hafi Orkuveitan fallist á að taka þátt í fjármögnun nýs sæstrengs til landsins sem einmitt muni auðvelda netþjónabúum, sem falast hafa eftir orkukaupum hér á landi, að hasla sér völl. Nýi strengurinn mun tengja Ísland við meginland Evrópu um Jótland í Danmörku. Þá segir Orkuveitan að hinir hugsanlegu orkukaupendur hafi skoðað margvíslega staði fyrir starfsemi sína, svo sem í Ölfusi, Helguvík og næsta nágrenni Hellisheiðarvirkjunar.

Orkuveita Reykjavíkur selur nú stórnotendum um 150 megavött af orku og hefur gert samninga um afhendingu liðlega 200 megavött til viðbótar á næstu árum. Í því skyni vinnur fyrirtækið nú að uppbyggingu Hellisheiðarvirkjunar og nýjar virkjanir við Hverahlíð og í Bitru eru í umhverfismati.