Þróunin í sveitunum ekki háskaleg

Einar K. Guðfinnsson landbúnaðarráðherra segir að fátt bendi til að þróunin í sveitum landsins sé á nokkurn hátt háskalega og að hún leiði til tjóns fyrir sveitirnar.

Þetta kom fram í máli hans við utandagskrárumræðu um uppkaup á jörðum og verndun landbúnaðarlands. Jón Bjarnason, þingmaður Vinstri - grænna, var málshefjandi og benti á að sátt hefði verið um það í lanindu að bændur væru vörslumenn lands síns og framleiddu hollar vörur á landinu. Uppkaup fjársterkra aðila á jörðum stefndu þessari stöðu og sátt í voða.

Einar K. Guðfinnsson landbúnaðarráðherra benti á að miklar breytingar hefðu orðið á búskaparháttum hér á landi á síðustu árum. Nýjar greinar hefðu komið til, eins og hestamennska, skógrækt og ferðamennska, og jarðir sem ekki hefðu verið nýttar áður væru nú nýttar undir hinar nýju greinar.

Þá sagði hann þróunina í sveitum landsins allt aðra en í lok síðustu aldar. Þá hafi jarðir verið að fara í eyði og menn talað um að ljósin væru að slokkna í sveitum landsins. Bændur hafi verið í fátæktargildrum og hefðu ekki geta selt jarðir sínar. Á því hefði orðið breyting og þar sem ljósin hefðu slokknað áður hefðu þau kviknað á ný með nýrri atvinnustarfsemi.

Eignamyndun hefði átt sér stað í sveitunum og lögbýlum hefði fjölgað frá því sem áður var. Spurði hann hvort málshefjandi teldi það vont að bændur væru að verða eignamenn. Þá sagðist hann ekki trúa því að Jón Bjarnason vildi vinna gegn því að fólk flytti aftur í sveitirnar.

Enn fremur benti Einar á að 84 prósent manna ættu eitt lögbýli og fá dæmi væru hér á landi um jarðasöfnun. Því væri fátt sem benti til þess að þróunin væri á nokkurn hátt háskaleg eða leiddi til tjóns fyrir sveitina.

Fleiri þingmenn tóku til máls og fögnuðu því að bændur gætu selt eignir sínar og að lögbýlum hefði fjölgað. Það væri betri staða en að sveitirnar færu í eyði. Hins vegar var einnig bent á að það þyrfti fylgjast vel með þeirri þróun að einstaklingar söfnuðu að sér jörðum. Þá var enn fremur bent á að þróunin hefði það í för með sér að ungt fólk ætti ekki mikla möguleika á að hefja búskap í dag.