Flugi Iceland Express seinkaði um átta tíma

Flugvél sem átti að fara frá Barcelona til Íslands  í gærkvöld seinkaði um nærri átta tíma. „Þetta er áætlunarflug og vélin átti að fara í loftið klukkan 10 í gærkvöld að íslenskum tíma. Við fórum í loftið um það bil átta tímum seinna," segir Arna Schram, einn farþega vélarinnar.

Matthías Páll Imsland, forstjóri Iceland Express, segir að seinkunn hafi orðið á flugleið milli Íslands og Barcelona vegna þess að vatnsrör hafi sprungið inni á salerni flugvélarinnar. „Svona seinkanir koma sem betur fer afar sjaldan fyrir hjá okkur," segir Matthías. Hann segir að mjög strangar reglur gildi um öryggi flugvéla. „Ef eitthvað er að vélunum fara þær ekkert í loftið fyrr en búið er að gera við," segir Matthías.

„Nú erum við óvænt föst í Glasgow, vegna þess að vélin sem við fórum með er minni en sú sem átti upphaflega að flytja okkur. Við þurftum því að millilenda til að fá eldsneyti," sagði Arna í samtali við Vísi klukkan 10 í morgun. Hún segir að skortur sé á upplýsingagjöf til farþega. „Það er mjög óþægilegt að fá ekki að vita nákvæmlega hvenær farið er í loftið. Við fáum eiginlega ekkert að vita fyrirfram, " segir Arna. Hún tekur þó fram að farþegar vélarinnar séu mjög rólegir og sýni flugfélaginu skilning.