Stefnubreyting breytir ekki skaðsemi virkjananna

Samtökin Sól á Suðurlandi, sem berjast gegn virkjunum Landsvirkjunar í neðri hluta Þjórsár, segja stefnubreytingu Landsvirkjunar að selja ekki álverum orku ekki breyta skaðsemi virkjananna.

Í tilkynningu frá samtökunum segir að stefna Landsvirkjunar sé áfram ógn við náttúruna, eignarrétt, mannréttindi, öryggi Sunnlendinga á jarðsjálftasvæðinu við Þjórsá og við afkomu þeirra til framtíðar.

Þá segja samtökin að ekki hafi þótt skynsamlegt að selja skinnið áður en björninn er unninn. Það geri Landsvirkjun hiklaust og treysti því að hún fái að fara sínu fram. Því einu megi treysta að fyrirtækið hyggist keyra virkjanir sínar í gegn, ekki fyrir almannahag heldur viðskiptalega hagsmuni orkufyrirtækis sem áfram hagi sér eins og ríki í ríkinu.

Enn fremur benda Samtökin á að ofþensla sé á suðvesturhorninu og virkjanir strax og nokkur hundruð störf í viðbót sé ekki það sem þjóðin þurfi núna.

„Við tökum mark á ábendingum Davíðs Oddssonar Seðlabankastjóra, nú eins og fyrir álverskosningarnar í Hafnarfirði. Davíð Oddsson varaði við þenslunni þá og hann varar við þenslunni nú. Landvernd, Náttúruverndarsamtökin flytja viðvaranir, Þórunn Sveinbjarnardóttir umhverfisráðherra minnir á afstöðu heimamanna og blandar ekki saman orkunýtingu og virkjunum. Björgvin G. Sigurðsson viðskiptaráðherra leggur til að leitað verði sátta, en Landsvirkjun fer áfram sínu fram og bakkar ekki um þumlung. Jarðrask og framkvæmdir eru þegar í gangi, þótt skipulag með virkjunum liggi aðeins fyrir öðrum megin við ána," segir í tilkynningu Sólar á Suðurlandi.