Leitar að barnfóstru

Madonna leitar nú logandi ljósi að barnfóstru fyrir son sinn, David Banda, sem hún ættleiddi frá Malaví í október. Leitin hefur staðið yfir frá því í desember og hefur söngkonan fengið vinkonur sínar, þær Stellu McCartney og Gwyneth Paltrow, í lið með sér. Það munu vera miklar kröfur Madonnu sem hrekja umsækjendurna frá; hún ætlar barnfóstrunni að búa undir sama þaki og börnin og bannar allar heimsóknir. Þar sem börn Madonnu fá ekki að horfa á sjónvarp verður barnfóstrunni einnig neitað um það. Kunnugir segja að söngkonan sé orðin nokkuð stressuð yfir barnfóstruleysinu, en hún er nú þegar með hóp manna í vinnu við að líta eftir hinum börnum hennar, þeim Lourdes og Rocco.