Heimild Skipta skapar ekki óeðlileg fordæmi

Geir H. Haarde forsætisráðherra segir þá ákvörðun fjármálaráðherra að veita fyrirtækinu Skiptum heimild til að fresta skráningu í Kauphöll Íslands ekki skapa óeðlileg fordæmi fyrir aðra samninga ríkisins. Hann segir að verið sé að bregðast við ófyrirséðum og óvenjulegum aðstæðum.

Steingrímur J. Sigfússon, formaður Vinstri - grænna, tók málið upp í óundirbúnum fyrirspurnum á Alþingi í dag. Hann benti á að með ákvörðun sinni hefði fjármálaráðherra verið að leysa eigendur Skipta undan þeirri skyldu að skrá félagið á markað og selja að minnsta kosti 30 prósenta hlut í félaginu fyrir áramót eins og kveðið hefði verið á um í samningi um sölu Símans árið 2005.

Forsvarsmenn fyrirtækisins hefðu borið fyrir sig að desember væri ekki heppilegur mánuður til skráningar og að Skipti tækju nú þátt í kaupum á slóvenska símanum. Þá taldi hann að ástæða þessa væri sú að forsvarsmenn Símans óttuðust að almenningur fengi hlutina í Símanum á óþarflega góðu verði og því fengju eigendur ekki nóg fyrir sinn snúð.

Spurði hann forsætisráðherra sem yfirmann einkavæðingarnefndar hvort þetta væri heppilegt fordæmi og hvaða mark yrði tekið á ákvæðum sams konar samninga í framtíðinni.

Forsætisráðherra sagði að fresturinn sem Skipti hefðu fengið hefði verið veittur við óvenjulegar aðstæður. Skipti hygði á fjárfestingar í Slóveníu og erfitt væri fyrir fyrirtækið að leggja fram allar upplýsingar nú fyrir áramót. Taldi hann að þessi frestun skipti ekki sköpum fyrir kaup almennings í félaginu og að kaupin í Slóveníu væru líklegri til þess að gera bréfin að góðri markaðsvöru. Þá taldi hann að málið skapaði ekki nein óeðlileg fordæmi fyrir aðra samninga.