Prúðustu ungmennin búa á Álftanesi

Álftanes er með einna lægstu tíðni afbrota miðað við íbúafjölda og eru afbrot, svo sem innbrot og þjófnaðir, afar fátíð þar miðað við önnur svæði í umdæmi lögreglunnar á höfuðborgarsvæðinu. Þetta kom fram á fundi sem lögreglan átti með lykilfólki frá Áfltanesi síðastliðinn miðvikudag.

Í bréfi sem Helgi Gunnarsson rannsóknarlögreglumaður sendi foreldrum á Áftanesi vegna þessa segir að árangurinn hafi náðs með samvinnu skóla, foreldra, bæjaryfirvalda og lögreglu. Hluta af árangrinum megi rekja til foreldrarölts í skólum, sem dragi úr afbrotatíðni meðal barna og unglinga.

„Almennt er ástandið gott en við viljum samt benda foreldrum í elstu bekkjum grunnskólanna á að nú hefur okkur borist til eyrna að nokkrir aðilar eru að selja bjór úr bílum sínum og ganga símanúmer um söluaðila á milli unglinga. Endilega ræðið þetta við unglingana ykkar og spornið við unglingadrykkju eins og unnt er. Saman getum við staðið á móti þessu en það er verra að vera einn við róðurinn," segir í bréfi Helga.