Hvetur OR og Ölfus til að endurskoða áform um Bitruvirkjun

Bæjarstjórn Hveragerðisbæjar leggst alfarið gegn áformum Orkuveitunnar um að reisa Bitruvirkjun og hvetur fyrirtækið og nágrannasveitarfélagið Ölfus til þess að endurskoða áform sín um framkvæmdir á og við Ölkelduháls og Bitru.

Bókun þessa efnis var samþykkt á fundi bæjarstjórnar í lok síðustu viku og þannig tekið undir bókanir bæjarráðs og skipulags- og bygginganefndar sveitarfélagsins.

Í bókun bæjarstjórnar vegna Birtuvirkjunar kemur fram að hún telji rétt að leitað verði annarra leiða til orkuöflunar áður en ráðist er í framkvæmdir á jafn viðkvæmu svæði og hér um ræðir. Svæðið sé á náttúruminjaskrá og sé vinsæll útvistarstaður.

Bendir bæjarstjórnin á að í frummatsskýrslu framkvæmdaaðila komi fram að áhrif vegna framkvæmdarinnar geti orðið veruleg í Hveragerði sem sé næsti þéttbýlisstaður við virkjunina í aðeins 4,5 km fjarlægð.

„Bæjarstjórn telur afar óábyrgt af sveitarfélaginu Ölfusi og OR að halda áfram með framkvæmd þar sem jafn mikil óvissa ríkir um áhrif á loft, vatnslindir og náttúru og hér um ræðir og hvetur hlutaðeigandi til að láta náttúruna njóta vafans," segir að endingu í bókun bæjarstjórnar Hveragerðisbæjar.