Fimm í haldi vegna hnífstunguárásar

Fimm manns eru nú í haldi lögreglunnar á Selfossi í tengslum við rannsókn lögreglunnar á hnífstunguárás við Hellisheiðarvirkjun á laugardagskvöld.

Tveir menn voru færðir í fangageymslur lögreglunnar í gær, þolandinn og meintur gerandi, en í gærkvöld og nótt voru þrír menn til viðbótar handteknir þar sem grunur er um að þeir hafi átt einhvern þátt í átökunum. Mennirnir eru allir Pólverjar.

Að sögn Þorgríms Óla Sigurðssonar hjá rannsóknardeild lögreglunnar á Selfossi eru yfirheyrslur yfir mönnunum að hefjast og má reikna með að þeim ljúki að mestu í dag. Hann segir atburðarásina óljósa því mikil ölvun hafi verið á staðnum.

Sá sem varð fyrir árásinni hlaut stungu- og skurðsár á kálfa og læri og var fluttur á slysadeild þar sem gert var að sárum hans.