Fékk tundurdufl með vel virkt sprengiefni í veiðarfæri

Togskipið Þorvarður Lárusson frá Grundarfirði fékk stórt tundurdufl í veiðarfæri sín á laugardag og reyndist sprengiefnið í því vel virkt.

Í tilkynningu frá Landhelgisgæslunni segir að skipið hafi verið á veiðum undan Látrabjargi þegar það fékk stóra álkúlu í veiðarfærin. Reyndist hún 120 sentímetrar í þvermál. Eftir samtal skipstjórans við sprengjusérfræðing lék enginn vafi á því að um var að ræða þýskt tundurdufl. Þeim var meðal annars lagt út við Látrabjarg til að trufla ferðir skipalesta á leið til Murmansk í seinni heimstyrjöld.

Skipstjórinn var beðinn um að halda til hafnar og var ákveðið að það yrði á Rifi á Snæfellsnesi. Hugðust sprengjusérfræðingar fara til móts við skipið á björgunarbáti en það reyndist ógerlegt vegna veðurs. Ekki reyndist mögulegt að gera duflið óvirkt um borð og var það því flutt á afvikinn stað og sprengt. Sprengiefnið úr duflinu reyndist vel virkt sem fyrr segir.