Vilja fresta flutningi ferðamála til iðnaðarráðuneytisins

Ferðamálasamtök Íslands vilja að Alþingi fresti því um ár að flytja málefni ferðamála frá samgönguráðuneytinu til iðnaðarráðuneytisins. Þetta kemur fram í ályktun sem samþykkt var á aðalfundi samtakanna í síðustu viku.

Þar er bent á að nýta þurfi árið til þess að samræma og undirbúa nauðsynlega þætti þessa mikilvæga máls betur. Einnig sé mikilvægt að trygga aukið fjármagn til framkvæmdarinnar og atvinnugreinarinnar.

Þá segja Ferðamálasamtök Íslands að undanfarna áratugi hafi átt sér stað stórstígar framfarir á öllum sviðum ferðaþjónustu og aðalfundurinn treysti á að þau verðmæti, sú reynsla og þekking sem orðið hafa til fái að þróast áfram til eflingar ferðaþjónustunni.