Gísli Marteinn verður mér innan handar

Ragnhildi Steinunni Jónsdóttur hefur verið úthlutað hið vandasama verk að vera kynnir í undankeppni Sjónvarpsins fyrir Euro-vision en fyrsta undankvöldið verður á dagskrá eftir viku. „Ég er enginn Gísli Marteinn eða Logi Bergmann,“ svarar Ragnhildur þegar hún er spurð hvort Euro-vision sé mikið áhugamál hjá sér. „Er svona meðalmanneskja í þessu,“ bætir hún við.

Ragnhildur gerði sér fyllilega grein fyrir því að hún mætti varla misstíga sig í beinni útsendingu því þá fengi hún öll Eurovision-nördin á bakið. „Núna fer ég bara að grennslast fyrir í bókum og gömlum keppnum og reyni að finna einhverja gullmola sem ekki hafa verið sagðir áður þótt það verði vissulega erfitt,“ segir Ragnhildur sem á þó eftir að nýta sér krafta áðurnefnds Gísla Marteins. „Fáir ef einhverjir eru jafn vel að sér í þessum fræðum og hann,“ bætir hún við. Ragnhildur verður ein á sviðinu og tekur við keflinu af Garðari Thór Cortes sem nú hefur tekið Bretland með trompi og leikkonunni Brynhildi Guðjónsdóttur en parið vakti mikla athygli fyrir líflega framkomu í fyrra.

Ragnhildur Steinunn hefur haft í nógu að snúast að undanförnu því auk þess að vera í Kastljósinu er hún að útskrifast úr sjúkraþjálfun í Háskólanum. Þá leikur hún aðalhlutverkið í kvikmyndinni Astrópíu en Ragnhildur sagðist ekki enn vera farin að stressa sig fyrir frumsýninguna enda fer myndin ekki í sýningar fyrr en í sumar. „Ég er ekki enn farin að leiða hugann að því en í júní verð ég örugglega komin með hnút í magann,“ segir Ragnhildur.