Urðu að hætta við Hvannadalshnjúk vegna veðurs

Björgunarsveitarmenn urðu að hætta við að klífa Hvannadalshnjúk í nótt vegna veðurs en nú viðrar vel á svæðinu þar sem leitað er að tveimur týndum ferðamönnum í grennd við Svínafellsjökul.

Björgunarmennirnir ætluðu að ganga upp á hnjúkinn og síðan niður helstu gönguleiðir en veður kom í veg fyrir það. Hins vegar hefur nú létt verulega til nema hvað þokuslæðingur er á öllum fjallatoppum. Um það bil 40 manns taka þátt í leitinni, þar af 23 klifurmenn og fimm menn með þrjá sporhunda.

Svæðið er afar erfitt yfirferðar og setja leitarmenn sig í hættu hvað eftir annað. Óljóst er hvort hundarnir koma að gagni en það verður reynt til þrautar í dag. Þyrla Landhelgisgæslunnar er búin að fljúga yfir óleitað svæði í morgun og er þessa stundina að fljúga yfir svæði vestan Hvannadalshnjúks.

Af búnaði, sem er í tjöldum þeirra, sem áhöfn þyrlunnar fann í gær, má ráða að þeir hafi búist þaðan til dagsferðar en ekki liggur fyrir hvenær þeir héldu í hana. Björgunarsveitarmenn binda vonir við að mennirnir kunni að finnast á lífi því óvenju hlýtt hefur verið í veðri á svæðinu undanfarna daga.

Fram kemur í tilkynningu frá Ríkislögreglustjóra, Landsbjörgu og lögreglustjóranum á Eskifirði að ráðgert sé að halda leitinni áfram af fullum krafti um helgina og í dag og kvöld munu fjallabjörgunarhópar víðs vegar af landinu bætast á svæðið til að taka þátt í leitinni.

Aðgerðinni er stýrt frá Samhæfingastöðinni í Skógarhlíð af landsstjórn björgunarsveita og fulltrúa Ríkislögreglustjórans sem er með forræði aðgerðarinnar í samráði við Lögreglustjórann á Eskifirði. Við stjórn á vettvangi er fulltrúi Ríkislögreglustjórans og svæðisstjórn björgunarsveita.