Sænskur yfirhönnuður hjá Chloe

Fatamerkið Chloe ættu flestir tískuspekúlantar að kannast við. Vinsældirnar náðu hæstum hæðum þegar hin heimfræga Stella McCartney hannaði fyrir fyrirtækið og náði þaðþannig að stimpla sig ærlega inn í tískuheiminn.

Eftir að Stella fór og stofnaði sitt eigið fyrirtæki var það hönnuðurinn ungi Phoebe Philo sem tók við en nú eru liðin tvö misseri síðan hún hvarf frá fyrirtækinu.

Nú er hins vegar stefnuleysið á enda hjá Chloe og hefur ungi strákurinn Paulo Melim Andersson verið ráðinn yfirhönnuður þar á bæ. Paulo er sænskur að uppruna og er bæði útskrifaður úr Central Saint Martins og London Royal College Of Arts. Áður en hann tók við Chloe var hann við stjórnvölinn hjá Marni tískuhúsinu.

Paulo er arftaki ekki minni hönnuða en Karls Lagerfeld og þeirra sem áður voru taldir og er fyrsta fatalína Chloe úr hans hönnun væntanleg í mars 2007.