94% nýútskrifaðra 10. bekkinga ætlar beint í framhaldsskóla

Framhaldsskólarnir eru nú hættir að taka við umsóknum fyrir komandi skólaár, alls bárust rúmlega 6.600 umsóknir nýnema, þar af 4.528 frá nýútskrifuðum tíundu-bekkingum. Það eru því rúm 94 prósent árgangsins sem nú er að yfirgefa grunnskólana sem ætlar beint í framhaldsskóla.

Þrátt fyrir margar umsóknir er pláss fyrir alla þessa nýnema í íslenskum framhaldsskólum, þó ekki fái allir pláss í þeim skóla sem þeir helst hefðu viljað. Umsóknir voru talsvert fleiri en skólapláss í nokkra skóla, sérstaklega Verslunarskóla Íslands, Kvennaskólann og Menntaskólann á Akureyri.