Ríkisstjórnin skoði hvað gert verði

Guðni Ágústsson landbúnaðarráðherra segir að ríkisstjórnin sé nú að fara yfir það hvernig hún geti brugðist við til að draga úr verðbólgu í landinu. Landbúnaðarráðuneytið komi að því eins og önnur ráðuneyti en hann vill ekki tilgreina til hvaða ráða landbúnaðarráðuneytið geti gripið.

Við erum að fara yfir þetta í ríkisstjórninni og það er allt undir í því. Landbúnaðurinn er skoðaður eins og annað og það verður farið yfir það, segir Guðni og bendir á að um samstarfsverkefni sé að ræða, margt annað vegi þyngra í vísitölu fjölskyldunnar en kjötverð.

Kaupmenn hafa gagnrýnt tollaútboð á kjötvörum í Fréttablaðinu og benda á að bjóðendur sendi stöðugt inn hærri boð til að tryggja sér kvóta. Guðni telur útilokað að gefa innflutninginn frjálsan. Íslendingar séu aðilar að alþjóðasamningum hvað þetta varðar.

Ólafur Friðriksson, embættismaður í landbúnaðarráðuneytinu, bendir á að tekjur úr tollaútboðunum renni í samfélagslegan sjóð, ríkissjóð.

Skortur er á svínasíðum, efni í skinku og beikonsneiðar, í landinu og sömuleiðis á efni í hakk og hamborgara. Guðni segir ráðuneytið reyna að fara eftir þeim reglum sem settar hafi verið upp og séu öllum kaupmönnum kunnar.