Fær ekki allar lóðirnar

Steinunn Valdís Óskarsdóttir segir það stríða gegn markmiðum útboðsins að einn einstaklingur fái úthlutað þrjátíu og níu einbýlishúsalóðum og hyggst leggja tillögu fyrir borgarráð á fimmtudag þar sem það verður tryggt að svo verði ekki. Tillagan gerir ráð fyrir að Benedikt Jósepsson sem átti hæsta tilboð í lóðirnar fái úthlutað einni lóð, sá sem átti næsthæsta tilboðið fá aðra og svo koll af kolli. Að sögn Benedikts hefur honum ekki verið boðið að samningaborðinu og lítur hann svo á að hann hafi allar lóðir þangað til. Steinunn Valdís átti ekki von á að þurfa að greiða skaðabætur vegna breytinganna á úthlutunarreglunum og er sannfærð um að borgin sé með lögin sín megin.

Vilhjálmur Þ. Vilhjámsson borgarfulltrúi sjálfstæðisflokksins segir stefnu R-listans í lóðamálum komna í ógöngur. Um lóðaúthlutunina við Úlfarsfell sagði hann að það yrði að fara yfir lögfræðilega þætti málsins ef reglum um útboðið verður breytt á fimmtudag.

Vilhjálmur segir ennfremur að R-listinn hafi keyrt upp lóðaverð með of litlu framboði af einbýlishúsalóðum og segir borgarstjóra tala eins og hann sé ekki staddur í Reykjavík. Hann segir lóðastefnu R-listans gjaldþrota og aðeins með auknu framboði lóða, þá sérstaklega einbýlishúsalóða, verði hægt að koma málum í réttan farveg. Vilhjámi finnst einkennilegt að flokkur sem segir sig jafnaðarflokk telji eðlilegt að lóðaverð sé eins hátt og raun ber vitni.

Þessu hafnar borgarstjóri alfarið og segir alls ekki hægt að kenna borgaryfirvöldum um lóðaverð, það séu allir sérfræðingar sammála um það.

--Steinunn