Sparisjóður Hafnarfjarðar kaupir 80% hlut í Allianz Ísland hf.

Sparisjóður Hafnarfjarðar (SPH) hefur fest kaup á 80% hlutafjár í eignarhaldsfélaginu Hring. Hringur á allt hlutafé í Allianz Ísland hf., sem er söluumboð fyrir þýska trygginga- og sjóðastýringarfyrirtækið Allianz.

Í fréttatilkynningu frá félaginu segir að Allianz Ísland verður áfram rekið sem sjálfstætt félag sem lýtur sjálfstæðri stjórn. Meðeigandi SPH að félaginu er Sparisjóður Kópavogs (SPK) sem átt hefur 20% hlutafjár í Hring - eignarhaldsfélagi um nokkurra ára skeið. Með þessum kaupum eykst enn sú þjónusta sem viðskiptavinum SPH stendur til boða en sú þjónusta sem tryggingarfélög veita er tengd þeirri þjónustu sem bankar og sparisjóðir bjóða. Þá eru kaupin einnig liður í þeirri stefnu SPH að vera framsækið fjármálafyrirtæki. Með kaupunum á Allianz Ísland er skotið styrkari stoðum undir tekjumyndun Sparisjóðs Hafnarfjarðar.

Hjá Allianz Ísland starfa í dag 17 manns auk 11 söluráðgjafa. Til viðbótar er félagið í samstarfi við fjórar tryggingamiðlanir.