Vill selja Keflavíkurflugvöll

Utanríkisráðherra vill stefna að því að selja rekstur Keflavíkurflugvallar. Þetta kom fram þegar ráðherra kynnti skýrslu um utanríkismál á Alþingi í dag. Formaður Samfylkingarinnar sagði í sömu umræðum að það yrði hennar verkefni að útfæra stefnuna í utanríkis- og alþjóðamálum - í næstu ríkisstjórn.

Utanríkisráðherra sagði markmið varnarviðræðna við Bandaríkin nú að ná niðustöðu sem Íslensk stjórnvöld telja fullnægjandi.

Vangaveltur um framtíðarnýtingu varnarsvæðisins og mannvirkjanna telur hann ótímabærar en hefur velt fyrir sér framtíð Keflavíkurflugvallar og þyrlubjörgunarsveitar, sem hann segir óháða varnarliði eða erlendum stjórnvöldum.

,,Ég tel að stefna eigi að því að einkafyrirtæki annist rekstur Keflavíkurflugvallar eins og tíðkast víða annars staðar. Þá væri stofnað hlutafélag í eigu ríkisins um rekstur flugvallarins, en ekki látið staðar numið þar heldur yrði félagið einkavætt í framhaldinu. Innlendum og erlendum fjárfestum byðist með þessu vænlegur fjárfestingarkostnaður", sagði utanríkisráðherra en tók fram að engar ákvarðanir hefðu verið teknir í þessu sambandi.

Ögmundur Jónasson þingmaður Vinstri grænna sagði flugvöllinn hins vegar óaðskiljanlegan hluta af öryggisviðbúnaði Íslendinga. Það ætti einnig við um Flugmálastjórn og Landhelgisgæsluna, en uppi væru áform um að einkavæða eða hlutafélagavæða þessar stofnanir.

Ingibjörg Sólrún Gísladóttir, formaður Samfylkingarinar, gagnrýndi ríkisstjórnina fyrir stefnuleysi. Sagði hana sitja úrræðalausa og bíða eftir því að Bandaríkjamenn vinni nýja varnaráætlun fyrir Ísland.

Að mati formanns Samfylkingarinnar eiga Íslendingar að vera frjálshuga boðberar nýrra hugmynda í utanríkis- og alþjóðamálum og sagði hún það verða verkefni Samfylkingarinnar í næstu ríkisstjórn að standa fyrir þeirri stefnumótun þegar þar að kæmi.