Sirrý og Heimir sýna jólaandann í verki

„Við viljum minna á það að desember er tími samhjálpar,“ segir Sigríður Arnardóttir, Sirrý, annar umsjónarmanna Íslands í bítið, sem ásamt Litaveri stendur fyrir jólaleik í anda þáttanna Extreme Makeover: Home Edition, sem sýndur er á Stöð tvö.

„Við bjóðum fólki semsagt að senda okkur í þættinum línu og benda okkur á fjölskyldur sem því finnst eiga skilið að íbúðin þeirra sé tekin í gegn og segir okkur söguna á bakvið.“

Skilafresturinn rennur út 1. desember en þá munu Sirrý og Heimir Karlsson fara vandlega yfir bréfin og ákveða hver hreppir hnossið. „Þá mæta starfsmenn Litavers á svæðið og taka íbúðina í gegn; mála íbúðina í hólf og gólf, teppaleggja, setja á veggfóður, dúkaleggja og svo framvegis. Á meðan fylgjumst við með öllu saman, ræðum við fólkið og sýnum íbúðina fyrir og eftir breytingar.“

Sirrý bendir á að í allsnægtarþjóðfélaginu Íslandi séu þeir til sem ekki hafa efni á að halda húsnæði sínu við. „Með þessu viljum við vekja fólk til umhugsunar um hvort það geti ekki gert eitthvað til að rétta öðrum hjálparhönd. Fyrir marga er mun mikilvægara að vera rétt hjálparhönd en að fá eitthvað glingur.“

Sirrý segir það fara eftir því hversu vaskir starfsmenn Litavers verða hvenær þátturinn verður á dagskrá en vonast til að geta gert veglegan jólaþátt úr þessu. Þeir sem vilja benda á fólk í leikinn geta sent línu á netfangið bitid@365.is.