Svifryk í Reykjavík frá Rússlandi

Svifryksmengun yfir Reykjavík var yfir heilsuverndarmörkum samfellt í tvo sólarhringa í síðustu viku vegna mengunar sem barst frá Rússlandi. Mengunin var viðvarandi í tvo sólarhringa og féll ekki niður yfir nóttina eins og vant er þegar mengunin er af völdum bílaumferðar í Reykjavík.

Er talið líklegt að svifryksmengunin hafi stafað af sinueldum frá vesturhluta Rússlands. Deildarstjóri mengunarvarna hjá umhverfissviði segir þetta skýrt dæmi um að loftslagsmál séu hnattræn og að það skipti máli í sérhverju landi hvað sé gert og hvernig brugðist sé við aðsteðjandi umhverfisvá.