Barthez er ekki á leið til Chelsea

Jose Mourinho hefur hafnað þeim fréttum sem voru á kreiki í enskum miðlum í morgun um að franski markvörðurinn Fabien Barthez væri á leið til Chelsea til að leysa Petr Cech af hólmi. Barhtez lagði hanskana á hilluna fyrir skömmu.

"Við erum að leita að þriðja markverði og Barthez er það ekki, hann er stórt nafn. Nú er fjöldi umboðsmanna að hringja í okkur og ef þeir hafa samband við okkur, hafa þeir samband við fjölmiðla í leiðinni," sagði Mourinho og bætti við að það væri ekki auðvelt að koma til Chelsea og standa undir væntingum en sagðist vonast eftir að finna sterkan markvörð til að koma í stað Cech.