Vestnorden mikilvæg fyrir ferðaþjónustuna

Gríðarstór kaupstefna ferðaþjónustuaðila, Vestnorden, stendur nú yfir í Laugardagshöllinni. Ferðamálastjóri segir allar ferðaskrifstofur, sem hingað selja ferðir, vera staddar hér á landi fyrir kaupstefnuna.

Ferðaþjónustuaðilar á Íslandi, Grænlandi, Færeyjum og Hjaltlandseyjum kynna þjónustu sína í Laugardalshöllinni í dag og stendur kaupstefnan fram til hádegis á morgun. Kaupstefnan var sett í gærkvöld í tuttugasta og fyrsta skipti en hún er haldin til skiptis í aðildarlöndunum og stækkar með hverju árinu. Nú eru hér á landi um 300 aðilar til að kynna þjónustu sína og 200 sem vilja kynna sér þjónustuna og selja ferðir til Íslands í útlöndum.

Magnús Oddsson, ferðamálastjóri, segir ráðstefnuna stækka með hverju árinu sem sýni vaxandi áhuga á svæðinu. Hann segir flestar erlendu ferðaskrifstofurnar vera frá Evrópu og Norður-Ameríku en í vaxandi mæli sýni Asíubúar svæðinu áhuga. Hann segir ráðstefnuna gríðarlega mikilvæga fyrir innlenda ferðaþjónustuaðila því að hana sæki allar erlendar ferðaskrifstofur sem selji ferðir til Íslands eða hinna landanna.