Karlmaður sýknaður af ákæru um kynferðisbrot gagnvart dóttur sinni

Karlmaður á fimmtugsaldri var sýknaður í Héraðsdómi Reykjavíkur í dag af ákæru um kynferðisbrot gagnvart dóttur sinni. Maðurinn átti að hafa lagst ofan á dóttur sína, sem þá var tíu ára gömul, girt niður um hana og sett getnaðarlim sinn í leggöng hennar. Maðurinn hefur alla tíð neitað sök í málinu. Í dómnum kemur fram að orð standi gegn orði hjá stúlkunni og föður hennar. Frásögn stúlkunnar þótti óljós og þá er skýrsla hennar einnig óljós um ýmis atriði. Kvensjúkdómalæknir bar fyrir dómi að vitnisburður stúlkunnar um atburðinn stæðist ekki, og svo virðist sem hún hafi ekki greint frá atburðinum á fyllilega réttan hátt. Maðurinn var eins og áður sagði sýknaður af ákærunni sem og bótakröfu stúlkunnar.