SA gera verkalýðshreyfingunni tilboð

Samtök atvinnulífsins hafa gert verkalýðshreyfingunni tilboð til að koma í veg fyrir að kjarasamningum verði sagt upp um næstu áramót.

Vihjálmur Egilsson, framkvæmdastjóri Samtaka atvinnulífsins sagði á blaðamannafundi í morgun, að efnahagsforsendur væru allt aðrar en gengið væri út frá í kjarasamningum. Þetta þýddi að hægt væri að segja öllum samningum upp, sem myndi leiða til enn meiri verðbólgu en nú er.

Atvinnurekendur bjóða 12 þúsund króna flata launahækkun og tilteknar hækkanir að auki á næstu misserum. Vilhjálmur segir að mesta kjarabótin sé að ná verðbólgunni niður, sem nú er sjö til átta prósent. Að öðrum kosti sé hætta á að verðbólgan sigli í tveggja stafa tölu á næsta ári og reynslan sýni að það geti verið mjög erfitt að ná henni niður aftur. Það sé sameiginlegt úrlausnarefni allra að ná verðbólgunni niður.