Læknanemar mættu ekki til vinnu

Læknanemar á fjórða og fimmta ári mættu ekki til vinnu sinnar á Landspítalanum í morgun. Það gerðu þeir heldur ekki í gær til þess að mótmæla því sem þeir kalla kjaraskerðingu af hálfu stjórnenda spítalans. Lækningaforstjóri Landspítalans segir hins vegar að laun ungra lækna hafi hækkað langmest í nýgerðum kjarasamningum.

Læknanemarnir hafa hingað til fengið greidd laun sem hlutfall af launum læknakandídata auk 12% vaktaálags og greiðslu í 10 daga fyrir undirbúningsnámskeið fyrir vinnu á spítalanum.

Með nýjum kjarasamningi í vor hækkuðu laun læknakandídata og þar með laun læknanema. Þegar læknanemar leituðu eftir sömu ákvæðum og í fyrri samningum sögðust forstöðumenn spítalans ekki hafa fjármagn til þess. Þeir gætu aðeins greitt 8% vaktaálag og borgað sjö daga af námskeiðinu.

Þetta sætta læknanemar sig ekki við og hafa sent yfirvöldum á spítalanum tilboð um að þeir haldi 12% vaktaálagi og fái greitt fyrir fimm daga af undirbúningsnámskeiðinu en því hafna spítalayfirvöld. Erik Brynjar Eriksson, formaður Félags læknanema bendir á að fjarvera læknanemananna, sem eru 34, hafi áhrif á sex til sjö deildum.