Engar reglur um leyfi ríkisstarfsmanna í átta ár

Reglur um leyfi starfsmanna frá störfum í ríkisþjónustu, sem setja átti fyrir átta árum, hafa enn ekki verið settar. Ástæða þess er misskráning í fjármálaráðuneytinu sem taldi málið afgreitt. Formaður Samfylkingarinnar segir málið pínlegt fyrir ráðuneytið.

Það var Ingibjörg Sólrún Gísladóttir, formaður Samfylkingarinnar, sem hljóp í skarðið fyrir Rannveigu Guðmundsdóttur og spurði forsætisráðherra hvað liði setningu reglna um leyfi starfsmanna frá störfum í ríkisþjónustu þegar þeir tækju tímabundið við öðrum störfum, eins og hjá alþjóðastofnunum.

Benti hún á þingsályktun um málið sem samþykkt var fyrir átta árum. Hún sagði enn fremur mikilvægt að skilið yrði á milli embættislegra og pólitískra ráðninga, en dæmi væru um að ómálefnaleg sjónarmið hefðu ráðið för í starfsmannamálum ríkisins. Í því samhengi benti hún á skipun hæstaréttardómara, starfslok framkvæmdastýru Jafnréttisstofu, ráðningu ráðuneytisstjóra í félagsmálaráðuneytið og málsmeðferð í máli ráðuneytisstjóra í viðskiptaráðuneytinu sem einmitt hefði fengið leyfi til að sinna störfum erlendis fyrir ríkið en komið til baka og fundið annan í sínu starfi.

Forsætisráðherra sagði að fjármálaráðuneytinu hefði verið falin framkvæmd þingsályktunarinnar. Forsætiráðuneytið hefði grennslast fyrir um málið þar á bæ og fengið þau svör að engar reglur hefðu enn verið settar. Ástæðan fyrir því hefði verið sú að bréf forsætisráðherra frá árinu 1998 hefði verið bókað sem afgreitt og gengið frá því þannig í skjalasafni fjármálaráðuneytisins á fyrri hluta árs 2000. Halldór sagði að ráðuneytið hygðist nú ganga í það að setja reglurnar.

Formaður Samfylkingarinnar sagði málið pínlegt fyrir ráðuneytið. Þar fyrir utan fyndist henni pínlegt að stjórnsýsla ríkisins skyldi vera með þeim hætti að mönnum hefði ekki dottið í hug að eigin frumkvæði að það þyrfti að setja reglur sem þessar.