Rétt að draga úr áherslu á ál við milljón tonna framleiðslu

Þegar framleiðsla á áli er komin í eina milljón tonna á ári er af ýmsum ástæðum rétt að draga úr áherslu á þeim vettvangi, sagði iðnaðarráðherra í fyrirspurnartíma á þingi í dag. Fyrirspyrjandi sakaði ráðherra um að vera á flótta í málefnum áliðnaðarins.

Það var Mörður Árnason sem spurði ráðherra að því hversu mörg terawött ráðherra teldi að fæ mætti árlega úr vatnsafli hérlendis með hagkvæmum hætti og að teknu tilliti til umhverfissjónarmiða. Sagðist hann að hluta til vera að endurtaka fyrirspurn frá því í mars sem hann taldi sig ekki hafa fengið skýr svör við. Innti hann ráðherra eftir skoðun.

Valgerður Sverrisdóttir sagði tölur um virkjanlegt vatnsafl hafa breyst í áranna rás meðal annars vegna breyttra viðhorfa varðandi umhverfisáhrif. Valgerður vitnaði til orða orkumálastjóra frá ársfundi Orskustofnunar 2004 í svari sínu. Ef til vill væri réttara að tala nú um 26 terawattsstundir á ári í stað 30 áður vegn breyttra viðhorfa varðandi umhverfisáhrif vatnsaflsvirkjana

Mörður spurði einnig hvort ráðherra væri enn þeirrar skoðunar sem hann lýsti í ræðu á iðnþingi í fyrra og var greint frá í ritinu Íslenskur iðnaðurað „þegar framleiðsla í stóriðju yrð komin í sem svarar til einnar milljónar tonna álframleiðslu á ári yrði af ýmsum ástæðum rétt að láta gott heita. Ráðherra sagði ekki rétt eftir sér haft.

Hún hafi hins vegar sagt við fjölmiðla eftir Iðnþingið að þegar framleiðsla á áli væri komin í eina milljón tonna á ári væri af ýmsum ástæðum rétt að draga úr áherslu á þeim vettvangi. Valgerður benti einnig á að þrjú starfandi álver í landinu hefðu öll lýst yfir frekari áhuga á fjárfestingu í greininni en að stjórnvöld drægju þar ekki vagninn.

En Mörður sagði ráðherra illa við umræðuna. Valgerður vildi ekki staldra við tölurnar vegna þess að hún vildi hafa eitt verkefni í einu þangað til svo langt væri gengið sem orkuiðnaðurinn, sem væri hinn eiginlegi húsbóndi ráðherra, væri orðinn ánægður og þegar ekki yrði fleira virkjanlegt af hagkvæmnisástæðum. Það væri hinn raunverulega ástæða fyrir því að iðnaðarráðherra væri á flótta í bæði fyrirspurnartímanum í gær og í mars.