Þyrlan getur ekki bjargað mönnunum af Hvannadalshnjúki

Skýjabakkar eru að setjast inn að Hvannadalshnjúki og er nú útséð með að þyrla Landhelgisgæslunnar geti lent til bjargar mönnunum fimm sem lentu þar í snjóflóði. Samkvæmt upplýsingum frá Slysavarnarfélaginu Landsbjörgu eru allir mennirnir eitthvað lemstraðir, en enginn alvarlega. Einhverjir eru ökklabrotnir og því ógöngufærir.

Reynt verður að ferja björgunarsveitarmenn upp á Öræfajökul með þyrlunni og þeir síga niður. Einnig munu fallhlífarsveitir flugbjörgunarsveita stökkva út úr flugvél Flugmálastjórnar en það mun vera í fyrsta skipti sem slíkt er gert í björgunaraðgerð hér á landi. Fjöldi björgunarsveitarmanna eru á leið á staðinn, frá Höfn og frá Reykjavíkursvæðinu.

Mennirnir voru á leið upp á Hnjúkinn á eigin vegum en voru með talstöð og gátu þannig haft samband og látið vita af sér og verið í góðu sambandi við björgunarmenn. Eftir því sem næst verður komist voru mennirnir á leið upp á Hnjúkinn sjálfan þegar flóðið féll á þá og bárust þeir alla leið niður á sléttuna fyrir neðan hann, niður í um 1950 metra hæð. Þeir hafa af því að dæma getað runnið niður einhverja 100-150 metra.