Vetrarveður er á Norður- og Austurlandi

Vetrarveður er á Norður- og Austurlandi og er jörð þar orðin alhvít. Úrkoman á eftir að aukast í dag og það er leiðindaspá fyrir morgundaginn. Það er vetrarlegt á Norður- og Austurlandi þessa dagana en á Akureyri snjóaði talsvert í nótt og í morgun og var 10 sentimetra jafnfallinn snjór á Akureyri. Ökumenn þurftu að beita sköfum sínum áður en haldið var til vinnu. Veðurhæðin er þó ekki búin að ná hámarki. Spáð er vaxandi norðanátt og mikilli snókomu eða slyddu á láglendi síðdegis og skafrenningi og mikilli ofankomu á fjallvegum. Hiti verður á bilinu 0-3 stig. Veðrið í dag verður einna verst með ströndum austan og norðan til með 10 -20 metrum á sekúndu. Vindur mun þó ganga niður á miðvikudag og það hlýnar í lok vikunnar samkvæmt veðurstofu NFS. Á morgun er hins vegar spáð snjókomu og hvössum vindi á Vestfjörðum.