Læra að skrifa fréttir og taka þær upp

Í Lindaskóla er heill bekkur níu og tíu ára barna sem gæti mannað helstu fréttastöður á Íslandi innan fárra ára. Krakkarnir í fjórða S.H. kunna nú þegar að skrifa fréttir, taka þær upp og klippa þær til. 

 Krakkarnir í fjórða S.H. læra margföldun og fallbeygingu og allt sem venjulegir fjórðubekkingar læra, en kennarinn þeirra hefur líka verið að kenna þeim að búa til fréttir, þegar tími vinnst til. Þau eru núna sjálfbjarga með flest sem við kemur fréttaskrifum, viðtölum, myndatöku, fréttaklippi og svo þegar allt er tilbúið, tengja þau sjálf myndvarpann og varpa fréttinni upp á tjald fyrir hina í bekknum.