Heimaþjónusta ljósmæðra í uppnámi

Samningar um heimaþjónustu milli Ljósmæðrafélags Íslands og Tryggingastofnunar ríkisins rennur út á miðnætti. Ljósmæðrum voru kynnt drög að nýjum samningi í dag en skilaboð þeirra eru skýr, þær sætta sig ekki við samninga undir kostnaðargreiningu.

Allt stefnir í að ófremdarástand skapist á fæðingarstofnunum landsins ef samningar nást ekki sem fyrst en rúm 60% mæðra kjósa að fara heim um sólarhring eftir fæðingu og nýta sér heimaþjónustu. Um 7-8 börn fæðast á hverjum sólarhring og því er hætta á sængurpláss fyllist fljótlega en á sængurkvennadeild Landspítalans-háskólasjúkrahúss eru 19 pláss og á Hreiðrinu eru sex pláss. Ljósmæður eru ósáttar voð þau tilboð sem Tryggingastofnun ríkisins hefur boðið þeim fram til þessa en þær segja verktatagreiðslur fyrir heimaþjónustu lágar, auk þess sem þær fá ekki greitt aukalega fyrir útlagðan kostnað og akstur til skjólstæðinga sinna. Guðlaug Einarsdóttir, formaður Ljósmæðrafélags Íslands, segir að samningar verði lausir á miðnætti en ljósmæður hafi ákveðið að sinna áfram þeim mæðrum sem þær þjónusta um þessar mundir. Það sé þó ekki víst að ljósmæður fái laun borguð fyrir þá vinnu sína, það eigi eftir að reyna á það.

Dvöl á sængurkvennadeild er mun kostnaðarsamari fyrir ríkið en heimaþjónusta ljósmæðra. Guðlaug segir að einn sólarhringur á sængurkvennadeild kosti ríkið álíka mikið og vika í heimaþjónustu ljósmæðra. Það geri um 75 milljónir krónur á ársgrundvelli.

Rósa Bragadóttir, deildarstjóri Hreiðursins, segir að það bagalegt ef heimaþjónustu ljósmæðra nýtur ekki við. Hún segir að slæmt ástand geti skapast ef ekki verður fundin lausn á deilunni en engar ráðstafanir hafa verið gerðar á Hreiðrinu vegna þessa.