Neitar að hafa vitað um vangoldin opinber gjöld

Eyjólfur Sveinsson segist ekki hafa vitað um vangoldin opinber gjöld ýmissa fyrirtækja sem hann var í forsvari fyrir. Aðalmeðferð í máli gegn honum og níu öðrum hófst í Héraðsdómi Reykjavíkur í dag.

Rétt er að taka fram að ekki er um hið svokallaða Frjálsrar fjölmiðlunar mál, þótt það fyrirtæki komi að málinu. Ljóst er að enn á eftir að taka skýrslur af fjölda vitna og ákærðra. Ákæran er í 9 liðum og lúta 8 þeirra að því að hafa ekki staðið skil á virðisaukaskatti nér staðgreiðslu opinberra gjalda, en einn liðurinn kveður á um umboðssvik og beinist hann að Eyjólfi og fjármálastjóri vísis.is, þar sem segir að fjármálastjórinn hafi að fyrirskipan Eyjólfs sem var stjórnarformaður millifært 24 milljónir króna af reikningi í SPRON, í formi yfirdráttar án þess að heimild væri fyrir hendi. Peningunum hafi verið ráðstafað að stórum hluta inn á reikninga Fréttablaðsins. Fjármálastjórinn bar fyrir dómi í morgun að hann hafi fært út af reikningnum fé sem átti að vera komið inn vegna sölu á vísi.is, en síðan hafi komið í ljós að sú greiðsla hafi ekki borist að fullu. Eyjólfur neitaði að hafa gefið fyrirmæli um að þessar færslur ættu sér stað. Hinir 8 ákæruliðirnir tengdust Dagsprenti, Markhúsinu, Nota Bene, Info, Póstflutningum og ÍP-prentþjónustunni, en Eyjólfur og oft Sveinn faðir hans komu að eign eða stjórn þessara fyrirtækja. Þeir feðgar könnuðst hvorugur við fyrir dómi að hafa vitað að virðisaukaskattur og staðgreiðsla opinberra gjalda væri í vanskilum fyrr en á seinni stigum. Ljóst hafi verið að þessi fyrirtæki hafi flest eða öll átt í erfiðleikum og í sumum tilfellum hafi ekki verið hægt að greiða laun og því ekki haldið eftir staðgreiðslu opinberra gjalda. Þá hafi, eins og í tilfelli Póstflutninga, ekki verið skýrt hvort fyrirtækið væri í virðisaukaskattsskyldum rekstri.