Fjölmenningarkarníval í Laugalækjarskóla

Börn og foreldrar þeirra fengu tækifæri til að kynna sér menningu fjarlægra landa og heimsálfa í Laugalækjarskóla í dag þegar heimsdagur barna var haldinn annað árið í röð. Börn gátu skráð sig í listsmiðjur og í nokkrum stofum skólans gátu börn og fullorðnir rætt við fólk um heimalönd þeirra og heimsálfur, meðal annars Akeem Oppong sem kynnti fólki Afríku. Akeem sagði það hafa komið í ljós að flestir vissu mjög lítið um Afríku. Þess vegna hefði hann lagt áherslu á að kynna fólki aðra hlið álfunnar en þá sem sést oftast í fréttum, því fjallaði hann um menningu og lífshætti fólks, ólík tungumál og hefðir hér og þar í Afríku.

Heimsdagur var í dag haldinn í annað skipti og í bæði skiptin hefur hann tengst vetrarhátíð Reykjavíkurborgar. Eva Rún Þorgeirsdóttir, viðburðafulltrúi Höfuðborgarstofu segir markmiðið meðal annars að kynna börnum menningu sem sé ólík þeirra eigin og kynna fjölmenningu fyrir þeim.