Skýringar Landsflugs ekki fullnægjandi

Þriðja tilvikið þar sem sjúkraflugvél var ekki til staðar í Vestmannaeyjum þegar á þurfti að halda kom upp á föstudag. Skýringar Landsflugs á þessum tilvikum eru engan veginn fullnægjandi, segir bæjarstjórinn í Eyjum.

Í síðustu viku var sagt frá tveimur tilvikum þar sem þörf var á sjúkraflugi frá Vestmannaeyjum en engin vél var til staðar. Í fyrra skiptið var um ræða fárveikt tveggja ára gamalt barn en í síðara tilvikinu þurfti að flytja karlmann með beinbrot til Reykjavíkur. Síðastliðinn föstudag var svo kallað eftir vélinni í þriðja skiptið á þremur dögum, án þess að hún væri til staðar. Ekki var unnt að fá upplýsingar á Heilbrigðisstofnun Vestmannaeyja í morgun um ástand hins slasaða eða veika sem þá átti í hlut. Sjúkravélin kom hins vegar aftur til Eyja seinna á föstudeginum.

Fyrir helgi óskuðu Vestmannaeyjabær og heilbrigðisráðuneytið eftir skýringum frá Landsflugi, sem sér um sjúkraflugið, um ástæður þess að vél hafi ekki verið til staðar í umræddum tilvikum. Rúnar Fossádal Árnason, framkvæmdastjóri Landsflugs, sagði að skýringa væri að vænta eftir helgi.

Bergur Elías Ágústsson, bæjarstjóri í Eyjum, sagði í samtali við NFS í morgun að skýringar hefðu borist, og þar kæmi fram að meginástæðan sem gefin sé upp sé sú að það vanti flugskýli í Eyjum fyrir vélina sem notuð er í sjúkraflugið, því Dornier-vélar af þeirri tegund sem umrædd flugvél er þurfi ávallt að geyma innandyra. Bergur segir þessar skýringar engan veginn fullnægjandi og bendir á að það standi afdráttarlaust í samningnum um sjúkraflugið að það eigi alltaf að vera vél til taks í Eyjum, og það sé algjör krafa bæjaryfirvalda að ekki sé vikið frá þeim skilmála. Þá segir bæjarstjórinn að forsvarsmenn Landsflugs hafi vitað það fullvel þegar skrifað var undir samninginn um flugið að ekkert flugskýli væri til staðar fyrir vélina.

Aðspurður hvert sé næsta skref í málinu segir Bergur að bæjaryfirvöld muni funda með forsvarsmönnum Landsflugs síðar í vikunni.