Launakostnaður í fiskvinnslu 23 sinnum hærri hér en í Kína

Tuttugu og þrír kínverskir fiskvinnslustarfsmenn þiggja samanlagt jafnhá laun og einn starfsmaður í fiski á Dalvík. Launakostnaður í fiskvinnslu er með öðrum orðum orðinn tuttugu og þrisvar sinnum hærri á Íslandi en í Kína.

Það vakti athygli á dögunum þegar Samherji auglýsti eftir fólki í störf í fiskvinnslu á Dalvík á fjórum tungumálum. Launin eru rúmar 300 þúsund krónur á mánuði sem veltir upp spurningum um samkeppnishæfi landans gagnvart t.d. Kína, en æ stærri hluti fiskvinnslu hefur flust þangað síðustu ár.

Þorsteinn Már Baldvinsson, forstjóri Samherja, segir að á Dalvík sé verið að borga 23 evrur á tímann. Í Þýsklandi kosti klukkutíminn 14 evrur og í Póllandi 3,5 evrur og Kína innan við eina evru. Þetta segi ýmislegt um samkeppnisstöðuna. Hann vill þrátt fyrir þetta ekki taka undir þær svartsýnisraddir að öll vinnsla á fiski hverfi úr landi.

En á sama tíma og laun fiskvinnslufólks eru sem dæmi á Dalvík á fjórða hundrað þúsund með bónus hafa sjómenn tekið á sig mikla kjaraskerðingu,.

Þorsteinn Már segir að það sé alvarlegast að laun sjómanna hafi lækkað um 20-30 prósentum síðastliðin fimm ár, mest á síðustu tveimur árum. Laun sjómanna séu tengd afurðaverði og gengi. Afurðaverð hafi hækkað en gengið hafi styrkst það mikið að laun sjómanna hafi lækkað verulega og það sé mikið áhyggjuefni.