Eitt stærsta fíkniefnamál sem komið hefur upp í Leifstöð

Enginn hefur verið handtekinn til viðbótar við karl og konu á þrítugsaldri sem voru handtekin í Leifsstöð við komu frá París á föstudag, eftir að um það bil fjögur kíló af amfetamíni fundust í farangri þeirra.

Að sögn Ásgeirs Karlssonar, yfirmanns fíkniefnadeildar lögreglunnar í Reykjavík, sem tekið hefur við rannsókn málsins af tollgæslunni og lögreglunni á Keflavíkurflugvelli, er rannsóknin á frumstigi, en fólkið var úrskurðað í allt að tveggja vikna gæsluvarðhald á laugardag. Talið er að smásöluverð efnisins sé á bilinu 40 til 60 milljónum króna, eftir því hversu hreint efnið er, en efnagreiningu er ekki full lokið. Lögreglan gefur ekki upp hvort fólkið hefur áður gerst brotlegt við fíkniefnalöggjöfina. Fólkið er íslenskt og er þetta eitt stærsta fíkniefnamál, sem upp hefur komið í Leifsstöð til þessa. Stutt er síðan að þrír átján ára drengir voru handteknir í Leifsstöð með hálft kíló af kókaíni í fórum sínum.