Fræðaþing landbúnaðarins viðamikið að vanda

Átrúnaður og hefðir í sauðfjárbúskap er meðal þess sem hægt er að kynna sér á Fræðaþingi landbúnaðarins sem hófst í dag. Fræðaþingið er árlegur viðburður en þar er kynnt nýsköpun í landbúnaði, skógrækt og landgræðslu, ásamt niðurstöðum úr hagnýtum rannsóknum í jarðrækt og búfjárrækt.

Það er Landbúnaðarskóli Íslands á Hvanneyri, Landgræðsla og Skógrækt ríkisins og Bændasamtök Íslands sem standa saman að fræðaþinginu sem er árviss viðburður. Meðal þess sem tekið var fyrir á fræðaþinginu í dag voru svokallaðar veggspjaldakynningar þar sem kynntar eru stærri sem minni rannsókna sem tengjast landbúnaði, landgræðslu og skógrækt. Hrönn Magnúsardóttir hefur kynnt sér átrúnað og hefðir í sauðfjárbúskap. Um litla en áhugaverða rannsókna er að ræða en Hrönn kannaði 13 atriði tengd hjátrú í sauðfjárbúskap meðal fimm bænda á Ströndum. Sem dæmi um hjátrú í sauðfjarbúskap þá má ekki marka lömb á sunnudegi og alls ekki á hvítasunnudegi. Ekki má heldur slátra fé í fyrstu viku vetrar, því þá missi bóndi eina kind eða fleiri. Hrönn segir að svo virðist sem margir viðmælenda hennar kannsist við þau 13 atriði sem hún spurði um en þó séu fáir sem viðurkenna að þeir taki mark á þeim. Hún segir það einkum eldra fólk sem þekkir til hjátrúar sem tengist sauðfjárbúskap en þá hafi vélavæðing í landbúnaði þau áhrif að hjátrú sem þessi gleymist.