Starfsmannaleigum gæti fækkað með tilkomu nýrra laga

Vinnumálastofnun reiknar með að ný lög um starfsmannaleigur verði til þess að margar þeirra leggi upp laupana. Hinar verði undir ströngu eftirliti og verði lokað ef þær misstígi sig.

Vinnumálastofnun veit af því að á annan tug starfsmannaleiga starfa hér á landi. Á miðnætti í nótt rennur út frestur hjá þeim til þess að skrá sig hjá stofnuninni. Um miðjan dag í dag höfðu aðeins tvær skráð sig. Undanfarin ár hafa mörg hundruð erlendir verkamenn verið við störf víðs vegar um Ísland án þess að nokkur opinber aðili hafi haft tölu á þeim eða vitað hvað þeir voru að gera. Með nýju lögunum sem sett voru á Alþingi er tekið fyrir þetta. Lögin sem taka gildi 1. febrúar eiga að koma í veg fyrir að hér á landi sé fólk í vinnu án tilskilinna leyfa. Þau eiga einnig að koma í veg fyrir að verkafólk sé hlunnfarið af starfsmannaleigum sem eru jafn misjafnar og þær eru margar. Nýjar reglur gera miklu einfaldara og fljótlegra fyrir löglega aðila að fá atvinnuleyfi afgreidd.

Vinnumálastofnun á von á því að það og stórlega aukið eftirlit verði til þess að starfsmannaleigum muni fækka talsvert. Starfsmannaleigurnar verða að gangast undir heilmikla skráningarskyldu sem gerir tiltölulega auðvelt að fylgjast með því að þær fari að lögum og reglum. Þær verða einnig að beygja sig undir margvísleg sérákvæði, til dæmis að hér á landi gildi íslenskir kjarasamningar. Því sé ekki hætta á því að hér gerist það sama og í Svíþjóð þar sem litháísk starfsmannaleiga reki umfangsmikla starfsemi á litháískum launakjörum. Gissur Pétursson, forstjóri Vinnumálastofnunar segir að hin nýju lög og samvinna við Samtök atvinnulífsins bindi enda á það ófremdarástand sem verið hefur í þessum málum undanfarin ár.