Ágreiningur um stækkun álvers í bæjarstjórn Hafnarfjarðar

Djúpstæður ágreiningur er í bæjarstjórn Hafnarfjarðar um stækkun álversins í Straumsvík og meirihluti Samfylkingarinnar er klofinn.

Þrátt fyrir andstöðu er þó líklegast að framkvæmdaleyfið verði veitt, fyrir tilstilli minnihluta sjálfstæðismanna í bæjarstjórn.

Stækkun álversins hefur verið til umræðu í bæjarkerfinu í Hafnarfirði í langan tíma, en deiliskipulag svæðisins var kynnt síðasta sumar. Fjölmargar athugasemdir bárust og bæjaryfirvöld vinna enn hörðum höndum að því að svara þeim.

Á meðan hefur stækkunin verið rædd í bæjarkerfinu og þar eru menn ekki á eitt sáttir. Valgerður Halldórsdóttir bæjarfulltrúi Samfylkingarinnar er á móti því að álverið í Straumsvík verði stækkað, flestir aðrir bæjarfulltrúar flokksins eru fylgjandi stækkuninni. Hið sama á við um sjálfstæðismennina í bæjarstjórn.

Svokallað mengunarsvæði var fyrst skilgreint í starfsleyfi álversins um miðjan sjöunda áratuginn og hefur lítið breyst síðan. Þó var svokallað þynningarsvæði umhverfis álverið skilgreint árið 1995 og ekki má vera íbúabyggð innan þess. Ekki stendur til að þetta svæði stækki eða að mengun aukist að ráði með stækkun álversins. Gangi það eftir virðist málið eiga greiða leið í bæjarstjórn.

Hins vegar hefur meira borið á andstöðu við stækkun álversins annars staðar í bæjarkerfinu. Umhverfisnefnd Hafnarfjarðar samþykkti til dæmis í sumar bókun þar sem fram kemur að nefndin leggist ekki gegn því að málið sé skoðað og deiliskipulagið rætt og kynnt en þó kysi hún að öll áform um stækkunina yrðu lögð til hliðar. Nefndin telji það þjóna best hagsmunum Hafnfirðinga til lengdar að ekki verði tekið meira land svo nærri íbúðabyggð undir mengandi stóriðju en það sem þegar sé búið að ráðstafa til slíkrar starfsemi.

Hugmyndir hafa verið uppi um atkvæðagreiðslu meðal bæjarbúa um stækkunina og hefur bæjarstjórinn sagt hana vel koma til greina.

Haraldur Þór Ólason, sem mun leiða lista Sjálfstæðisflokksins í sveitarstjórnarkosningunum í vor, segir að sjálfstæðismenn muni beita sér fyrir að stækkun álversins að því tilskyldu að mengunarkröfur verði uppfylltar. Þá telur hann atkvæðagreiðslu meðal bæjarbúa um málið óþarfa og telur kjörna bæjarfulltrúa fullfæra um að taka ákvörðun í málinu.