Hundruð manna um allan heim læra íslensku á Netinu

Hundruð manna um allan heim leggja stund á íslenskunám á Netinu. Námið kallast Icelandic Online og er þróað við Háskóla Íslands. Mikill áhugi er fyrir íslenskunáminu og eru dæmi þess að nemar hafi klárað námi og síðan komið til landsins til að læra málið enn betur.

Kolbrún Friðriksdóttir, verkefnisstjóri Icelandic Online, segir námið vera þróað á vegum Hugvísindastofnunar Háskóla Íslands í samstarfi við Stofnun Sigurðar Nordals, íslenskuskorar og sex erlendra háskóla. Námið er sjálfsnám og er opið öllum endurgjaldslaust. Náminu er skipt á tvö stig, eitt og tvö, en námið í heild sinni samsvarar tveggja missera námi í íslensku við Háskóla Íslands.

Stór hluti nemanna sem stundar íslenskunámið á netinu, er búsettur erlendis, meðal annars í Kanada þar sem fólk af íslenskum ættum er fjölmennur hópur. Kolbrún segir að nemendur séu víða um heim og þess séu dæmi að nemar klári námskeiðið á Netinu og komi svo til Íslands til að læra meira í íslensku, margir hverjir við Háskóla Íslands. Hún segir að ástæður fyrir þessum mikla áhuga á íslenskunni geti verið margvíslegar s.s vegna íslenskrar tónlistar, menningar eða íslenskra vina.