Það er þrengt að hestamönnum í höfuðborginni segir formaður LH

Jón Albert Sigurbjörnsson Formaður Landssambands hestamanna hefur áhyggjur af því hversu þrengt er að hestamönnum á höfuðborgarsvæðinu og segir hann að sveitafélög verði að taka harðar á þessum málum annars stefni í óefni.

Á síðustu mánuðum hafa hestamenn á höfuðborgarsvæðinu fylgst með uppkaupsmönnun sem hafa verið að kaupa upp hesthús á höfuðborgarsvæðinu og þá aðallega á félagssvæði Hestamannafélagsins Gusts. Hesthúsahverfið á Heimsenda hefur einnig verið til umræðu en þar eru uppkaupsmenn þegar búnir að kaupa nokkur hús. Eðlilega er kurr í mönnum og óttast hestamenn að með þessu framhaldi verði þeir hraktir með atvinnustarfsemi sína út fyrir bæjarmörkin.

Jón Albert hefur miklar áhyggjur af þessum málum og er ákveðin í að standa vörð um hagsmuni hestamanna. í Fréttum á NFS í kvöld sagði hann að það kæmi ekki til greina að reka hestamenn upp til fjalla til að stunda sitt sport og atvinnu. Jón hefur þegar átt fund með öllum formönnum hestamannafélaga á höfuðborgarsvæðinu til að ræða þetta málefni og segir hann að það sé lykilatriði að félögin standi saman.

Það er stór munur á eignarhaldi almennra íþróttasvæða en svæðum hestamannafélaga sem eru í einkaeigu að hluta en sveitafélögin séu eigendur almennra íþróttasvæða.