Lögregla og sýslumaður banna Klámkvöld á Traffic

Bannið tók gildi í dag en skipuleggjendum klámkvöldsins varð kunnugt um fyrirhugaðar aðgerðir lögregluyfirvalda í gær, svo engir miðar voru settir í forsölu eins og til stóð.

Skippuleggjendur kvöldsins hafa sent frá sér yfirlýsingu þar sem þeir harma aðgerðir lögreglunnar og sýslumanns. Skipuleggjendur telja að kvöldið, skipulagning þess og/eða auglýsingar á því hafi ekki brotið nein lög. Þeir benda á að klámkvöld hafi verið haldið árlega á Traffic síðan árið 2001 og fram til þessa hafi ekki verið sett út á það, enda hafi aldrei neitt ólöglegt farið fram á þessum kvöldum. Þá segir einnig í yfirlýsingunni að engin kvenfyrirlytning eigi sér stað á klámkvöldinu, líkt og margir vilji halda. Klámkvöldin séu haldin fólki til skemmtunar. Skipuleggjendur klámkvöldsins hyggjast standa fyrir Bláu kvöldi á skemmtistaðnum Hápunktinum í Keflavík annað kvöld. Að þeirra sögn verður dagskráin með sama sniði og til stóð en nafnið á kvöldinu er annað, sem og staðsetningin.

Karl Hermannsson, yfirlögregluþjónn í Reykjanesbæ, segir margar ástæður fyrir því að klámkvöldið hefur verið bannað, en skemmtistaðurinn hefur verið sviptur skemmtanaleyfinu tímabundið. Hann segir að nokkuð hafi verið um að fólk undir aldri hafi verið hleypt inn á skemmtistaðinn og margir hafi einnig haft samband við lögregluna, almennir borgarar sem ekki voru alls kosta sáttir við klámkvöldið. Fyrirhuguð skemmtun hafi því verið kornið sem fyllti mælirinn.

Eigandi skemmtistaðarins Traffic, Jósep Þorbjörnsson, vildi ekki koma í viðtal vegna þessa en sagði að hann hefði fengið vilyrði frá lögreglunni um endurnýjun á skemmtanaleyfinu eftir helgi, jafnvel fyrr.

Yfirlýsing skipuleggjenda er eftirfarandi:

"Skipuleggjendur Klámkvöldsins harma þá ákvörðun lögreglunnar í Keflavík að banna skemmtunina sem átti að fara fram annað kvöld. Við teljum að kvöldið, skipulagning þess og/eða auglýsingar á því hafi ekki brotið nein lög.

Klámkvöldið hefur verið haldið síðan 2001 og hefur lögregla ekki sett út á það sem hefur farið fram á kvöldinu frá byrjun. Við viljum ítreka það að ekkert ólöglegt hefur eða mun fara fram á þessum kvöldum. Lögreglan setur aðeins út á auglýsingaplakat kvöldsins en ekki skemmtunina sjálfa.

Við viljum einnig að það komi fram að í Klámkvöldinu felst engin kvenfyrirlitning eins og margir hafa viljað halda fram. Kvöldið átti aðeins að vera haldið öðrum til skemmtunar og hafa gestir kvöldsins komið og farið ánægðir í þau fjögur ár sem það hefur verið haldið.

Skipuleggjendur Klámkvöldsins vilja jafnframt taka það fram að Blátt kvöld verður haldið á skemmtistaðnum Hápunktinum í Keflavík annað kvöld.

Kveðja,

Skipuleggjendur Klámkvöldsins